https://youtu.be/X6WNpnEiQno
Մինչև 20 աշակերտ ունեցող դասարանների պարագայում ուսումնական գործընթացն իրականացվելու է պահպանելով հակահամաճարակային կանոնները, իսկ եթե կա ավելի քան 20 աշակերտ, դասարանները կկիսվեն խմբերի, դպրոց կհաճախեն հերթականությամբ՝ շաբաթական՝ 3 օր: Այս մասին հայտարարել է ԿԳՄՍ փոխնախարար Ժաննա Անդրեասյանը, ում խոսքերով, դա կօգնի նվազեցնել շփումը:
Դպրոցում պետք է ամեն օր պարտադիր ախտահանում լինի, իսկ եթե դպրոցում կլինի երկրորդ հերթ, ախտահանում կլինի երկու անգամ:
Սահմանված են օդափոխության կանոնները:
Դիմակների կրման մասով գործում է ընդհանուր կարգավորումը, որը կա փակ տարածքների մասով, սակայն թեմայի շուրջ քննարկումները շարունակվում են, երբ ամփոփում լինի, այդ մասին տեղեկություններ կփոխանցվեն:
Կանոններ կան նաև դպրոցներում կորոնավիրուսի հայտնաբերման և հայտնաբերման դեպքում հաջորդ քայլերի մասին: Եթե դպրոցում դեպքերը լինեն 10 տոկոս և ավելին, այդ դպրոցները որոշ ժամանակով չեն գործի: Այսինքն, լինելու են առանձին մոտեցումներ:
Նախատեսված է նաև թեստավորման գործընթաց դպրոցի աշխատակազմի համար, որի մասով ուղեցույցը կհրապարակի ԱՆ-ն:
Ռիսկի խմբում գտնվողների համար նախատեսվում է կենտրոնացված հեռավար ուսուցման կազմակերպում, եթե առկա ուսուցումը ցուցված չի լինի: Դրա համար ծնողը պետք է դիմում ներկայացնի, ինչը պետք է ամրապնդված լինի բժշկի ցուցմամբ:
Ռիսկի խմբում գտնվող ուսուցիչները կունենան ընտրության հնարավորություններ: Նրանց առաջարկվել է դպրոց հաճախել հատուկ պաշտպանիչ միջոցներով, որոնք կտրամադրի պետությունը: Նրանք կարող են ընտրել հեռավար ուսուցմանը մասնակցելը: Երրորդ տարբերակն այն է, որ ուսուցիչները կարող են աշխատանքի չներկայանալ, նրանց կփոխարինեն ուրիշները:
Փոխնախարարն ասաց, որ հնարավոր թվի ու փոխարինողների մասով պատկերացում ունեն ու կարող են գործընթացն իրականացնել:
